Узнагароды ад Нацыянальнай акадэміі навук Беларусі
26 сакавіка 2021 года ў вялікай канферэнц-зале Прэзідыума Нацыянальнай акадэміі навук Беларусі адбылася ўрачыстая цырымонія падвядзення вынікаў і ўзнагароджанне пераможцаў І Рэспубліканскага конкурсу творчых пісьмовых работ «За што я люблю родную зямлю». Конкурс быў аб’яўлены ў рамках Года малой радзімы Цэнтрам даследаванняў беларускай культуры, мовы і літаратуры НАН Беларусі яшчэ ў 2020 годзе. У ліку конкурсных работ — вершы, апавяданні, эсэ і творы іншых жанраў, якія раней не дасылаліся на конкурсы і не друкаваліся. У творах адлюстраваны пачуццё гонару і любоў да малой радзімы, яе гераічнага мінулага, дасягненні ў развіцці рэгіёнаў на сучасным этапе.
У конкурсе прынялі ўдзел 847 чалавек рознага ўзросту і прафесій з усёй Беларусі. Журы вызначыла 200 лепшых работ у 12 намінацыях: “З легендаў і казак былых пакаленняў…”, “Натхняе родная зямля”, “Магутная сіла паэзіі”, “Скарбонка ўспамінаў”, “Старонкі мінулага”, “Краязнаўчы далягляд”, “Мінулае і сучаснасць”, “Мова маёй Радзімы”, “Маладыя галасы”, “Замілаванне родным краем”, “Родныя краявіды”, “Скарбы роднай зямлі”.
На конкурс былі прадстаўлены творы пяці горацкіх аўтараў, і кожны з іх адзначаны дыпломам за выдатныя дасягненнні ў конкурсе творчых пісьмовых работ і каштоўным энцыклапедычным выданнем пра Беларусь. Сярод удзельнікаў і выкладчыкі Беларускай дзяржаўнай сельскагаспадарчай акадэміі.
Пераможцамі ў намінацыі “Магутная сіла паэзіі” сталі Аляксандр Клачкоў, прафесар кафедры сельскагаспадарчых машын факультэта механізацыі сельскай гаспадаркі, і ветэран педагагічнай працы, былы выкаладчык акадэміі Лідзія Мініч. У намінацыі “Натхняе родная зямля” дыплом пераможцы атрымала дацэнт кафедры кадастра і зямельнага права землеўпарадкавальнага факультэта БДСГА Святлана Ластачкіна.
Шчыра віншуем нашых шаноўных пісьменнікаў з новымі творчымі дасягненнямі, выдатнай перамогай на рэспубліканскім узроўні і жадаем плёну і натхнення на ніве літаратурнай дзейнасці!
Людміла Дзеружкова, педагог-арганізатар упраўлення па выхаваўчай рабоце з моладдзю .